ऑलिंपिकला जायचेय पण...

ऑलिंपिकला हजेरी लावणे ही वन्स इन लाईफटाईम म्हणतात, तशी संधी. आपल्या शहरात ही संधी चालून आली म्हटल्यावर लंडनवासी त्यावर तुटून पडतील अशी आशा होती. मात्र अजूनही काही स्पर्धांची  तिकीटे खपली नसल्याच्या बातम्या येत आहेत. दुसरीकडे आमची ऑलिंपिकला जायची इच्छा आहे, पण तिकीटच नाहीत, असे म्हणणारेही अनेकजण दिसताहेत. खरे तर ऑलिंपिकची तिकीटे मिळण्याच्या प्रक्रियेमुळेच हा गोंधळ होत आहे.

वर्षभरापूर्वीच ऑलिंपिक तिकीटांची विक्री अधिकृतपणे सुरू झाली. सुरवातीलाच ज्यांनी ती आरक्षित केली, त्यांना फारसा त्रास झालेला नाही. मात्र ऑलिंपिकच्या आधी २- ३ महिने ज्यांना जाग आली, त्यांची मात्र पंचाईत झाली. कारण सर्वसामान्यांच्याआवाक्यातील तिकीटे तोपर्यंत संपली होती. तिकीटांची न परवडणारी किंमत हेच खुर्च्या रिकाम्या राहण्यामागचे कारण असावे. किंमतीनुसार तिकीटे चार श्रेणीत विकली जात आहे आणि ए श्रेणीची सर्वात महागडी तिकीटेच शिल्लक राहिली आहेत. जगभर गाजलेल्या लंडन ऑलिंपिक उद्घाटन सोहळ्याची काही तिकीटे शेवटपर्यंत विकली गेली नव्हती. एए श्रेणीतील एका श्रेणीतील तिकीटाची किंमत २०१२ पाउंड (एक लाख साठ हजार रुपयांहून अधिक) तर ए श्रेणीतील तिकीटांची प्रत्येकी १६०० पाउंड एवढी किंमत होती.

रिसेलच्या तिकीटांमधून भाग्यवान असाल तर तिकीटे मिळवण्याची संधी हाती राहिली आहे. लंडन ऑलिंपिक २०१२ च्या अधिकृत संकेतस्थळावरून परत आलेली तिकीटे विकण्याची सोय केली आहे. ही रिसेलची तिकीटे उपलब्ध झाल्याचे कळल्यानंतर वेबसाईट उघडून बघेपर्यंत त्यातील निम्म्याहून अधिक तिकीटे संपलेली असतात. आयत्या वेळी रांगा लावून तिकीट खरेदीची सोय काही खेळांसाठी आहे, तर काही ठिकाणी तसे नाही.

ऑलिंपिकची सर्वाधिक तिकीटविक्री ऑनलाईनच झाली. तिकीटांसाठी अधिकृत संकेतस्थळावरूनच व्यवहार करा असे ऑलिंपिक संयोजक सतत सांगत असले तरी बोगस संकेतस्थळांवरून ऑलिंपिक तिकीटविक्रीची लिंक देण्याचे प्रकार अजून सुरू आहेत. त्यासंदर्भात चेकलिस्ट दिली असली, तरी रोज अशा प्रकारे बनवाबनवी करणाऱ्यांवर कारवाई होत असल्याच्या बातम्या येत आहेत.

ऑलिंपिकची ७० टक्के तिकीटे ब्रिटनवासीयांनी विकत घेतली आहेत. युरोपीयन युनियनमधून येणाऱ्या प्रेक्षकांना तिकीटे मिळणे सोयीचे जावे यासाठी संयोजकांनी तिकीटांचा ठराविक कोटा या देशांच्या ऑलिंपिक डेलिगेशनकडे दिला होता. आज चेक रिपब्लिकच्या डेलिगेशनकडे तिकीटे शिल्लक आहेत, उद्या दुसऱ्या कुठल्या, अशा बातम्यांना ऊत येत आहे. त्यामुळे तिकीटांसाठी धावपळ करणाऱ्यांसाठी एखादे दार किलकिले होते खरे पण रांगा लावण्याआधी कुठलीच शाश्वती देता येत नाही.